śrīmad bhagavad gīta pañchamō'dhyāyaḥ
atha pañchamō'dhyāyaḥ |
arjuna uvācha |
saṃnyāsaṃ karmaṇāṃ kṛṣṇa punaryōgaṃ cha śaṃsasi |
yachChrēya ētayōrēkaṃ tanmē brūhi suniśchitam || 1 ||
śrībhagavānuvācha |
saṃnyāsaḥ karmayōgaścha niḥśrēyasakarāvubhau |
tayōstu karmasaṃnyāsātkarmayōgō viśiṣyatē || 2 ||
jJṇēyaḥ sa nityasaṃnyāsī yō na dvēṣṭi na kāṅkṣati |
nirdvandvō hi mahābāhō sukhaṃ bandhātpramuchyatē || 3 ||
sāṅkhyayōgau pṛthagbālāḥ pravadanti na paṇḍitāḥ |
ēkamapyāsthitaḥ samyagubhayōrvindatē phalam || 4 ||
yatsāṅkhyaiḥ prāpyatē sthānaṃ tadyōgairapi gamyatē |
ēkaṃ sāṅkhyaṃ cha yōgaṃ cha yaḥ paśyati sa paśyati || 5 ||
saṃnyāsastu mahābāhō duḥkhamāptumayōgataḥ |
yōgayuktō munirbrahma nachirēṇādhigachChati || 6 ||
yōgayuktō viśuddhātmā vijitātmā jitēndriyaḥ |
sarvabhūtātmabhūtātmā kurvannapi na lipyatē || 7 ||
naiva kiñchitkarōmīti yuktō manyēta tattvavit |
paśyañśṛṇvanspṛśañjighannaśnangachChansvapañśvasan || 8 ||
pralapanvisṛjangṛhṇannunmiṣannimiṣannapi |
indriyāṇīndriyārthēṣu vartanta iti dhārayan || 9 ||
brahmaṇyādhāya karmāṇi saṅgaṃ tyaktvā karōti yaḥ |
lipyatē na sa pāpēna padmapatramivāmbhasā || 10 ||
kāyēna manasā buddhyā kēvalairindriyairapi |
yōginaḥ karma kurvanti saṅgaṃ tyaktvātmaśuddhayē || 11 ||
yuktaḥ karmaphalaṃ tyaktvā śāntimāpnōti naiṣṭhikīm |
ayuktaḥ kāmakārēṇa phalē saktō nibadhyatē || 12 ||
sarvakarmāṇi manasā saṃnyasyāstē sukhaṃ vaśī |
navadvārē purē dēhī naiva kurvanna kārayan || 13 ||
na kartṛtvaṃ na karmāṇi lōkasya sṛjati prabhuḥ |
na karmaphalasaṃyōgaṃ svabhāvastu pravartatē || 14 ||
nādattē kasyachitpāpaṃ na chaiva sukṛtaṃ vibhuḥ |
ajJṇānēnāvṛtaṃ jJṇānaṃ tēna muhyanti jantavaḥ || 15 ||
jJṇānēna tu tadajJṇānaṃ yēṣāṃ nāśitamātmanaḥ |
tēṣāmādityavajjJṇānaṃ prakāśayati tatparam || 16 ||
tadbuddhayastadātmānastanniṣṭhāstatparāyaṇāḥ |
gachChantyapunarāvṛttiṃ jJṇānanirdhūtakalmaṣāḥ || 17 ||
vidyāvinayasampannē brāhmaṇē gavi hastini |
śuni chaiva śvapākē cha paṇḍitāḥ samadarśinaḥ || 18 ||
ihaiva tairjitaḥ sargō yēṣāṃ sāmyē sthitaṃ manaḥ |
nirdōṣaṃ hi samaṃ brahma tasmādbrahmaṇi tē sthitāḥ || 19 ||
na prahṛṣyētpriyaṃ prāpya nōdvijētprāpya chāpriyam |
sthirabuddhirasaṃmūḍhō brahmavidbrahmaṇi sthitaḥ || 20 ||
bāhyasparśēṣvasaktātmā vindatyātmani yatsukham |
sa brahmayōgayuktātmā sukhamakṣayamaśnutē || 21 ||
yē hi saṃsparśajā bhōgā duḥkhayōnaya ēva tē |
ādyantavantaḥ kauntēya na tēṣu ramatē budhaḥ || 22 ||
śaknōtīhaiva yaḥ sōḍhuṃ prākśarīravimōkṣaṇāt |
kāmakrōdhōdbhavaṃ vēgaṃ sa yuktaḥ sa sukhī naraḥ || 23 ||
yō'ntaḥsukhō'ntarārāmastathāntarjyōtirēva yaḥ |
sa yōgī brahmanirvāṇaṃ brahmabhūtō'dhigachChati || 24 ||
labhantē brahmanirvāṇamṛṣayaḥ kṣīṇakalmaṣāḥ |
Chinnadvaidhā yatātmānaḥ sarvabhūtahitē ratāḥ || 25 ||
kāmakrōdhaviyuktānāṃ yatīnāṃ yatachētasām |
abhitō brahmanirvāṇaṃ vartatē viditātmanām || 26 ||
sparśānkṛtvā bahirbāhyāṃśchakṣuśchaivāntarē bhruvōḥ |
prāṇāpānau samau kṛtvā nāsābhyantarachāriṇau || 27 ||
yatēndriyamanōbuddhirmunirmōkṣaparāyaṇaḥ |
vigatēchChābhayakrōdhō yaḥ sadā mukta ēva saḥ || 28 ||
bhōktāraṃ yajJṇatapasāṃ sarvalōkamahēśvaram |
suhṛdaṃ sarvabhūtānāṃ jJṇātvā māṃ śāntimṛchChati || 29 ||
ōṃ tatsaditi śrīmadbhagavadgītāsūpaniṣatsu brahmavidyāyāṃ yōgaśāstrē śrīkṛṣṇārjunasaṃvādē
karmasaṃnyāsayōgō nāma pañchamō'dhyāyaḥ ||5 ||