śiva bhujaṅga prayāta stōtram
kṛpāsāgarāyāśukāvyapradāya
praṇamrākhilābhīṣṭasandāyakāya |
yatīndrairupāsyāṅghipāthōruhāya
prabōdhapradātrē namaḥ śaṅkarāya ||1||
cidānandarūpāya cinmudrikōdya-
tkarāyēśaparyāyarūpāya tubhyam |
mudā gīyamānāya vēdōttamāṅgaiḥ
śritānandadātrē namaḥ śaṅkarāya ||2||
jaṭājūṭamadhyē purā yā surāṇāṃ
dhunī sādya karmandirūpasya śambhōḥ
galē mallikāmālikāvyājatastē
vibhātīti manyē gurō kiṃ tathaiva ||3||
nakhēnduprabhādhūtanamrālihārdā-
ndhakāravrajāyābjamandasmitāya |
mahāmōhapāthōnidhērbāḍabāya
praśāntāya kurmō namaḥ śaṅkarāya ||4||
praṇamrāntaraṅgābjabōdhapradātrē
divārātramavyāhatōsrāya kāmam |
kṣapēśāya citrāya lakṣma kṣayābhyāṃ
vihīnāya kurmō namaḥ śaṅkarāya ||5||
praṇamrāsyapāthōjamōdapradātrē
sadāntastamastōmasaṃhārakartrē |
rajanyā mapīddhaprakāśāya kurmō
hyapūrvāya pūṣṇē namaḥ śaṅkarāya ||6||
natānāṃ hṛdabjāni phullāni śīghaṃ
karōmyāśu yōgapradānēna nūnam |
prabōdhāya cētthaṃ sarōjāni dhatsē
praphullāni kiṃ bhō gurō brūhi mahyam ||7||
prabhādhūtacandrāyutāyākhilēṣṭa-
pradāyānatānāṃ samūhāya śīgham|
pratīpāya namraughduḥkhāghpaṅktē-
rmudā sarvadā syānnamaḥ śaṅkarāya ||8||
viniṣkāsitānīśa tattvāvabōdhā -
nnatānāṃ manōbhyō hyananyāśrayāṇi |
rajāṃsi prapannāni pādāmbujātaṃ
gurō raktavastrāpadēśādbibharṣi ||9||
matērvēdaśīrṣādhvasamprāpakāyā-
natānāṃ janānāṃ kṛpārdraiḥ kaṭākṣaiḥ |
tatēḥ pāpabṛndasya śīghaṃ nihantrē
smitāsyāya kurmō namaḥ śaṅkarāya ||10||
suparvōktigandhēna hīnāya tūrṇaṃ
purā tōṭakāyākhilajJṇānadātrē|
pravālīyagarvāpahārasya kartrē
padābjamradimnā namaḥ śaṅkarāya ||11||
bhavāmbhōdhimagnānjanānduḥkhayuktān
javāduddidhīrṣurbhavānityahō'ham |
viditvā hi tē kīrtimanyādṛśāmbhō
sukhaṃ nirviśaṅkaḥ svapimyastayatnaḥ ||12||
||iti śrīśaṅkarācārya bhujaṅgaprayātastōtram||