kētu kavacham
dhyānaṃ
kētuṃ karālavadanaṃ citravarṇaṃ kirīṭinam |
praṇamāmi sadā kētuṃ dhvajākāraṃ grahēśvaram || 1 ||
| atha kētu kavacam |
citravarṇaḥ śiraḥ pātu bhālaṃ dhūmrasamadyutiḥ |
pātu nētrē piṅgalākṣaḥ śrutī mē raktalōcanaḥ || 2 ||
ghāṇaṃ pātu suvarṇābhaścibukaṃ siṃhikāsutaḥ |
pātu kaṇṭhaṃ ca mē kētuḥ skandhau pātu grahādhipaḥ || 3 ||
hastau pātu suraśrēṣṭhaḥ kukṣiṃ pātu mahāgrahaḥ |
siṃhāsanaḥ kaṭiṃ pātu madhyaṃ pātu mahāsuraḥ || 4 ||
ūrū pātu mahāśīrṣō jānunī mē'tikōpanaḥ |
pātu pādau ca mē krūraḥ sarvāṅgaṃ narapiṅgalaḥ || 5 ||
phalaśrutiḥ
ya idaṃ kavacaṃ divyaṃ sarvarōgavināśanam |
sarvaśatruvināśaṃ ca dhāraṇādvijayī bhavēt || 6 ||
|| iti śrībrahmāṇḍapurāṇē kētukavacaṃ sampūrṇam ||