Back

শ্রীমদ্ ভগবদ্ গীত চতুর্থোঽধ্যাযঃ

অথ চতুর্থোঽধ্যাযঃ |


শ্রীভগবানুবাচ |
ইমং বিবস্বতে যোগং প্রোক্তবানহমব্যযম্ |
বিবস্বান্মনবে প্রাহ মনুরিক্ষ্বাকবেঽব্রবীত্ || 1 ||

এবং পরংপরাপ্রাপ্তমিমং রাজর্ষযো বিদুঃ |
স কালেনেহ মহতা যোগো নষ্টঃ পরংতপ || 2 ||

স এবাযং মযা তেঽদ্য যোগঃ প্রোক্তঃ পুরাতনঃ |
ভক্তোঽসি মে সখা চেতি রহস্যং হ্যেতদুত্তমম্ || 3 ||


অর্জুন উবাচ |
অপরং ভবতো জন্ম পরং জন্ম বিবস্বতঃ |
কথমেতদ্বিজানীযাং ত্বমাদৌ প্রোক্তবানিতি || 4 ||


শ্রীভগবানুবাচ |
বহূনি মে ব্যতীতানি জন্মানি তব চার্জুন |
তান্যহং বেদ সর্বাণি ন ত্বং বেত্থ পরংতপ || 5 ||

অজোঽপি সন্নব্যযাত্মা ভূতানামীশ্বরোঽপি সন্ |
প্রকৃতিং স্বামধিষ্ঠায সংভবাম্যাত্মমাযযা || 6 ||

যদা যদা হি ধর্মস্য গ্লানির্ভবতি ভারত |
অভ্যুত্থানমধর্মস্য তদাত্মানং সৃজাম্যহম্ || 7 ||

পরিত্রাণায সাধূনাং বিনাশায চ দুষ্কৃতাম্ |
ধর্মসংস্থাপনার্থায সংভবামি যুগে যুগে || 8 ||

জন্ম কর্ম চ মে দিব্যমেবং যো বেত্তি তত্ত্বতঃ |
ত্যক্ত্বা দেহং পুনর্জন্ম নৈতি মামেতি সোঽর্জুন || 9 ||

বীতরাগভযক্রোধা মন্মযা মামুপাশ্রিতাঃ |
বহবো জ্ঞানতপসা পূতা মদ্ভাবমাগতাঃ || 10 ||

যে যথা মাং প্রপদ্যংতে তাংস্তথৈব ভজাম্যহম্ |
মম বর্ত্মানুবর্তংতে মনুষ্যাঃ পার্থ সর্বশঃ || 11 ||

কাংক্ষংতঃ কর্মণাং সিদ্ধিং যজংত ইহ দেবতাঃ |
ক্ষিপ্রং হি মানুষে লোকে সিদ্ধির্ভবতি কর্মজা || 12 ||

চাতুর্বর্ণ্যং মযা সৃষ্টং গুণকর্মবিভাগশঃ |
তস্য কর্তারমপি মাং বিদ্ধ্যকর্তারমব্যযম্ || 13 ||

ন মাং কর্মাণি লিংপংতি ন মে কর্মফলে স্পৃহা |
ইতি মাং যোঽভিজানাতি কর্মভির্ন স বধ্যতে || 14 ||

এবং জ্ঞাত্বা কৃতং কর্ম পূর্বৈরপি মুমুক্ষুভিঃ |
কুরু কর্মৈব তস্মাত্ত্বং পূর্বৈঃ পূর্বতরং কৃতম্ || 15 ||

কিং কর্ম কিমকর্মেতি কবযোঽপ্যত্র মোহিতাঃ |
তত্তে কর্ম প্রবক্ষ্যামি যজ্জ্ঞাত্বা মোক্ষ্যসেঽশুভাত্ || 16 ||

কর্মণো হ্যপি বোদ্ধব্যং বোদ্ধব্যং চ বিকর্মণঃ |
অকর্মণশ্চ বোদ্ধব্যং গহনা কর্মণো গতিঃ || 17 ||

কর্মণ্যকর্ম যঃ পশ্যেদকর্মণি চ কর্ম যঃ |
স বুদ্ধিমান্মনুষ্যেষু স যুক্তঃ কৃত্স্নকর্মকৃত্ || 18 ||

যস্য সর্বে সমারংভাঃ কামসংকল্পবর্জিতাঃ |
জ্ঞানাগ্নিদগ্ধকর্মাণং তমাহুঃ পংডিতং বুধাঃ || 19 ||

ত্যক্ত্বা কর্মফলাসংগং নিত্যতৃপ্তো নিরাশ্রযঃ |
কর্মণ্যভিপ্রবৃত্তোঽপি নৈব কিংচিত্করোতি সঃ || 20 ||

নিরাশীর্যতচিত্তাত্মা ত্যক্তসর্বপরিগ্রহঃ |
শারীরং কেবলং কর্ম কুর্বন্নাপ্নোতি কিল্বিষম্ || 21 ||

যদৃচ্ছালাভসংতুষ্টো দ্বংদ্বাতীতো বিমত্সরঃ |
সমঃ সিদ্ধাবসিদ্ধৌ চ কৃত্বাপি ন নিবধ্যতে || 22 ||

গতসংগস্য মুক্তস্য জ্ঞানাবস্থিতচেতসঃ |
যজ্ঞাযাচরতঃ কর্ম সমগ্রং প্রবিলীযতে || 23 ||

ব্রহ্মার্পণং ব্রহ্ম হবির্ব্রহ্মাগ্নৌ ব্রহ্মণা হুতম্ |
ব্রহ্মৈব তেন গংতব্যং ব্রহ্মকর্মসমাধিনা || 24 ||

দৈবমেবাপরে যজ্ঞং যোগিনঃ পর্যুপাসতে |
ব্রহ্মাগ্নাবপরে যজ্ঞং যজ্ঞেনৈবোপজুহ্বতি || 25 ||

শ্রোত্রাদীনীংদ্রিযাণ্যন্যে সংযমাগ্নিষু জুহ্বতি |
শব্দাদীন্বিষযানন্য ইংদ্রিযাগ্নিষু জুহ্বতি || 26 ||

সর্বাণীংদ্রিযকর্মাণি প্রাণকর্মাণি চাপরে |
আত্মসংযমযোগাগ্নৌ জুহ্বতি জ্ঞানদীপিতে || 27 ||

দ্রব্যযজ্ঞাস্তপোযজ্ঞা যোগযজ্ঞাস্তথাপরে |
স্বাধ্যাযজ্ঞানযজ্ঞাশ্চ যতযঃ সংশিতব্রতাঃ || 28 ||

অপানে জুহ্বতি প্রাণং প্রাণেঽপানং তথাপরে |
প্রাণাপানগতী রুদ্ধ্বা প্রাণাযামপরাযণাঃ || 29 ||

অপরে নিযতাহারাঃ প্রাণান্প্রাণেষু জুহ্বতি |
সর্বেঽপ্যেতে যজ্ঞবিদো যজ্ঞক্ষপিতকল্মষাঃ || 30 ||

যজ্ঞশিষ্টামৃতভুজো যাংতি ব্রহ্ম সনাতনম্ |
নাযং লোকোঽস্ত্যযজ্ঞস্য কুতোঽন্যঃ কুরুসত্তম || 31 ||

এবং বহুবিধা যজ্ঞা বিততা ব্রহ্মণো মুখে |
কর্মজান্বিদ্ধি তান্সর্বানেবং জ্ঞাত্বা বিমোক্ষ্যসে || 32 ||

শ্রেযাংদ্রব্যমযাদ্যজ্ঞাজ্জ্ঞানযজ্ঞঃ পরংতপ |
সর্বং কর্মাখিলং পার্থ জ্ঞানে পরিসমাপ্যতে || 33 ||

তদ্বিদ্ধি প্রণিপাতেন পরিপ্রশ্নেন সেবযা |
উপদেক্ষ্যংতি তে জ্ঞানং জ্ঞানিনস্তত্ত্বদর্শিনঃ || 34 ||

যজ্জ্ঞাত্বা ন পুনর্মোহমেবং যাস্যসি পাংডব |
যেন ভূতান্যশেষেণ দ্রক্ষ্যস্যাত্মন্যথো মযি || 35 ||

অপি চেদসি পাপেভ্যঃ সর্বেভ্যঃ পাপকৃত্তমঃ |
সর্বং জ্ঞানপ্লবেনৈব বৃজিনং সংতরিষ্যসি || 36 ||

যথৈধাংসি সমিদ্ধোঽগ্নির্ভস্মসাত্কুরুতেঽর্জুন |
জ্ঞানাগ্নিঃ সর্বকর্মাণি ভস্মসাত্কুরুতে তথা || 37 ||

ন হি জ্ঞানেন সদৃশং পবিত্রমিহ বিদ্যতে |
তত্স্বযং যোগসংসিদ্ধঃ কালেনাত্মনি বিংদতি || 38 ||

শ্রদ্ধাবাংল্লভতে জ্ঞানং তত্পরঃ সংযতেংদ্রিযঃ |
জ্ঞানং লব্ধ্বা পরাং শাংতিমচিরেণাধিগচ্ছতি || 39 ||

অজ্ঞশ্চাশ্রদ্দধানশ্চ সংশযাত্মা বিনশ্যতি |
নাযং লোকোঽস্তি ন পরো ন সুখং সংশযাত্মনঃ || 40 ||

যোগসংন্যস্তকর্মাণং জ্ঞানসংছিন্নসংশযম্ |
আত্মবংতং ন কর্মাণি নিবধ্নংতি ধনংজয || 41 ||

তস্মাদজ্ঞানসংভূতং হৃত্স্থং জ্ঞানাসিনাত্মনঃ |
ছিত্ত্বৈনং সংশযং যোগমাতিষ্ঠোত্তিষ্ঠ ভারত || 42 ||


ওং তত্সদিতি শ্রীমদ্ভগবদ্গীতাসূপনিষত্সু ব্রহ্মবিদ্যাযাং যোগশাস্ত্রে শ্রীকৃষ্ণার্জুনসংবাদে

জ্ঞানকর্মসংন্যাসযোগো নাম চতুর্থোঽধ্যাযঃ ||4 ||

PDF, Full Site (with more options)